O Cluster do Textil galego presentará nuns días o seu Plan Estratéxico, centrado na internacionalización
11.09.2010O sector formúlase o uso das TIC e a venda 'on line' como principais "retos" VIGO, 10 (EUROPA PRESS) A Xunta de Galicia e o Cluster do Textil galego presentarán "en poucos días" o Plan Estratéxico do sector, segundo anunciou este venres o conselleiro de Economía e Industria, Javier Guerra, durante o acto de presentación deste cluster.
Guerra explicou que ese Plan incidirá, como principal obxectivo na internacionalización das empresas para mellorar a súa competitividade. Así mesmo, preténdese "cambiar as empresas, porque cambiou o mercado", e mellorar cuestións como a formación dos traballadores e a utilización das novas tecnoloxías.
O conselleiro recalcou a importancia do cluster, que aglutina as 230 empresas que antes se integraban nas dúas principais asociacións do téxtil --Cointega e Atexga--. "Estas empresas, case todas pemes, decidiron dar un paso adiante para compartir dificultades, medios e esforzos", apuntou.
Por outra banda, advertiu de que as empresas téxtiles de Galicia "probablemente non poden competir en custos" polo que deben aproveitar o seu 'know-how' e buscar a diferenciación "pola calidade, o servizo e a marca". "Debemos apuntar a un mercado medio ou medio-alto", sinalou.
INTERNET
O Cluster puxo en marcha unha Plataforma Tecnolóxica, coa finalidade de "identificar as tecnoloxías e facelas accesibles ás pymes" no proceso de produción, distribución e, sobre todo comercialización, segundo explicou Alberto Rocha, secretario deste organismo.
Así, subliñou a importancia crecente de aplicacións como a venda on line, as páxinas webs das empresas, as tecnoloxías aplicadas á comercialización, etc. Nese sentido, recoñeceu que a venda do produto por internet é o principal "reto" e que "a maioría de empresas" do téxtil ten xa a súa páxina en internet, "están a preparar" os sistemas de venda e está a "interactuar cos seus clientes" a través da rede.
Algunhas das medidas que se prevén implantar nos puntos de venda é os 'magic mirrors' --espellos interactivos nos probadores dos comercios--, escáneres tridimensionais, ou pantallas táctiles que permiten aos clientes buscar información dos produtos que hai nas tendas. As novas tecnologias permitirán, ademais, mellorar a trazabilidade dos produtos, e a intercomunicación entre produtores, minoristas e clientes finais.
'EMPREGATEX'
Os responsables do cluster tamén fixeron referencia ao programa 'Empregatex', de axuda ás persoas desempregadas deste sector para atopar unha saída profesional, cofinanciado pola Xunta e o Fondo Europeo de Adaptación á Globalización --en Galicia son 500 os traballadores que poderán acollerse ás axudas deste fondo--.
Os itinerarios deste programa ten tres tipos de actividades: as destinadas a orientar e recualificar a persoas que perderon o seu emprego para obteñan outro traballo no sector téxtil; as actividades destinadas á reinserción noutro sector; e as actividades de promoción do autoemprego